Бодлын завсар

Бүсгүй хүний гоо үзэсгэлэн
Идэр залуугийн уярал
Хамаг л сайн сайхан 
Хорын муу бүхий л
Харцанд оршдогийг
Авах гээх хосоороо 
Харцанд л оршдогийг
Хэзээ мэдэх 

*******

Бүүдгэр тэнгэрт талархана
Бүгдээс намайг харамлана гэж
Хуучны дуунд уярна
Тэнүүлч бодлыг үргээнэ
Хүйтэн бороонд норно
Хөөрүү сэтгэлийг номхоруулна

*******

Уртын дууны шуранхай
Алс тэртээд цуурайтах шиг
Уулс болоод өвгөдийн минь
Үсгийг надад шивнэх шиг

*******

Тэнгэрийн гүнээ шунахуйд
Хар цагааныг дэнсэлнэ 
Миний тэнгэр 
Чинадын оюун ч юм уу

******

Дөлгөөн мандал мяралзан
Аниргүйн чимээн автахад
Нуурын эзэнтэй хөөрөлдөнө

******

Шинэхэн нарны туяанд үнсүүлж сэрэхдээ
Жаргал зөгнөсөн зүүднээсээ салан ядна
Хэнд ч үгүй миний л амьдрал гэж
Тэнгэр өөд шивнэн алдана

******

Гунигт дурсамжууд зүрх шивнэ
Цаг нь иржээ
Шинэ хаалга өөд

******

Тийм ээ, би тэс өөр ертөнц
Балчир ахуйд чинь туульдаг байсан тэр л ертөнц
Хэний ч мэдэх огторгуй ертөнц
Хэн ч хараагүй Би ертөнц

******

Хөх униар 
Бодлын захад суунаглана
Хүмүүний огторгуй
Тэрүүгээр орчилдоно

******